MINGGU VII DUNG
TRINITATIS
MINGGU
14 JULI 2013
JAMITA : I RAJA-RAJA 3 : 4 – 14
SIBASAON
: I Korintus 2:6-16
EPISTEL
SIBASAON : I KORINTUS 2 : 6 – 16
Salinan Nats Jamita : I
Raja-Raja 3 : 4 - 14
4
Di Gibeon do langgatan pamelean
na umbonggal. Jotjot do si Salomo manghaulkon haul disi. Di na sadari kehe ma
ia tusi, dihaulkon ia ma saribu haul di langgatan na disi.
5
Borngin i dipataridahon TUHAN
ma diriNa tusia di bagasan nipi jana manyapai, "Aha do dipangido rohamu
lehenonKu tu ho?"
6
Dialusi si Salomo ma,
"TUHAN! Madung dipatidahon Ho basa na holong situtu do rohaMu di damang si
Daud naposoMi. Denggan do ia, tigor, bope burju tu Ho. Torus do dipatidahon Ho
holong ni roha godang disia. Tangkas do i tarida angke madung dilehen Ho disia
sada anak na mamarenta saonnari manggontihon ia.
7
Ale TUHAN Debatangku, madung
diangkat Ho au gabe raja gonti ni damang, haru pe poso situtu dope au jana na
so umboto sanga songon dia laho mamarenta.
8
Maringanan di tonga-tonga ni
bangso na dung dipili Ho gabe bangsoMu do au. Sada bangso na godang situtu na
so taretong bahatna.
9
Hara ni i ale TUHAN, lehen ma di au habisuhon na porlu di au
laho mamarenta bangsoMon di bagasan hatigoran jana anso tangkas di au
paasingkon dia na denggan, jana dia na jat. Muda nada songon i, songon dia
ma tarbaen au mamarenta bangsoMu na godang on?"
10
Job do roha ni TUHAN di
pangidoan ni si Salomo i
11
gabe didok ma tusia,
"Dibaen habisuhon do dipangido ho laho mamarenta di bagasan hatigoran,
nada umur na ginjang sanga hamoraonmu sanga pe hamamate ni angka musumu,
12
gabe oloanKu ma pangidoanmi. BaenonKu ma ho gabe halak na umbisuk, jana
na umbahat pangastuion sian sude halak na dung jungada mangolu sanga halak na
giot mangolu dope di portibi on.
13
Salang angka na so dipangido ho
pe lehenonKu do di ho. Salolot mangolu
ho mamora ma ho jana dipasangap halak lumobi sian raja na asing sanga na ise
pe.
14
Jana muda burju ho mangoloi Au songon amamu si Daud, jana dipatulus ho angka
uhumKu lehenonKu ma di ho umur na ginjang.
A. PATUJOLONA (I Raja-Raja 3 : 4 – 14)
Buku I Raja-raja songon udut ni buku Samuel
na mancaritohon sejarah pamarentaon ni raja-raja Israel. Sejarah na
nicaritohon di buku on bisa dibagi dibagasan tolu bagian: (1) Parmonding ni Raja Daud dohot panabalan ni
anakna si Salomo gabe raja di Israel dohot
Juda manggontihon si Daud. (2) Pamarentaon ni Raja Salomo dohot angka usahana, khususna na mambangun Bagas Joro ni
TUHAN di Yerusalem. (3) Bangso Israel na
marbolat gabe dua harajaon di utara dohot
harajaon selatan, jana sejarah raja-raja na mamarenta di dua harajaon i lopus
tu parsitongaan abad sambilan andorang so Masehi (Seb.M). Di dua buku Raja-raja on, sude raja dinilai marhite hasetiaanna tu
TUHAN; jana keberhasilan ni bangso
tarida songon akibat ni pangoloion dohot hasetiaon i. Sabalikna, panyombaon tu
gana-ganaan dohot na manyimbil sian parenta ni TUHAN mangkorhon bencana
(kehancuran).
Turpuk on marpardomuan tu parmulaan pamarentaon di harajaan
na diuluhon ni Raja Salomo. Kota Gibeon
maringanan 10 km di sabola barat laut ni
Jerusalem. Penduduk ni kota onma na
jungada mangakali si Josua namandok halahi naro sian luat nadao, anso bisa
mangikat pardonganon dohot Israel, harana mabiar halahi di serang bangso Israel
(Josua 9-10). Andorang so pembangunan ni Bagas Joro ni TUHAN dison ma bangso
Israel patupa ibadah di dolok-dolok tarmasuk di dolok Gibeon gabe pusat
panyombaon hatiha i. Jana dison ma Raja salomo patupa kurban panyombaon tu TUHAN,
jana marnipi dapotan bisuk songon na dipatorang di turpuk on (I Raj.3:4-5). Di zaman saonnari goar Gibeon gabe digonti
gabe ALJIB.
Adong tolu hal na porlu simomosanta hombar tu thema:
“Marroha nagok bisuk” marhite turpuk
jamita on.
B. IMPOLA JAMITA : I Raja-Raja 3 : 4 – 14
I.
Raja Salomo napargunahon
hakna mangido bisuk tu TUHAN (ay.4-5// Mat.7:7)
Dung pasahat panyombaon 1000
parhaulan tu TUHAN borngin nai dipataridahon TUHAN ma diriNa tu Raja Salomo
jana manyapai: "Aha do dipangido rohamu lehenonKu tu ho?." Sian
najolo (zaman Padan na Honok) lopus tu Padan na Imbaru dohot di ari naparpudion
sasintong na udut ni tanggungjawab pangoloion sai na dilehen TUHAN do hak
pasahat pangidoan sian umatNa tu Ibana (band.Raja Hizkia, Uzia, Daniel; Mat.7:7).
Tapi harupe songoni pe laing adong dope umat naporsaya naso pasahat pangidoanna
tu TUHAN di ngoluna (sai adong dope na holan mangandalkon gogo sandiri jana
malas martangiang). Jungada di Pelayanan
nami manangiangkon sada ama na marsahit kritis, jana adong pangidoan ni boru
panggoaranna anso ulang jo mate bapakna painte so ro ibana. Hatihai hami dokkon
sigop ma ho ro inda borhat dope bapakmu painte so ro ho hami tangiangkon pe. Luar
biasa dioloi TUHAN do tangiang i: pukul 20.00 wib borngin lalu boruna i dung
pukul 04.00 wib pagi pe anso monding amanta i (jolo puas mangaligi dohot
komunikasi terbatas). Ima salah satu contoh pangoloion ni TUHAN dipangidoan.
Æ
Sianon taida situtu n i Raja Salomo margunahon hakna mangido naporlu tu tugas
utama di ngoluna.
II.
Pangidoaan na bebas dibagasan habonaran dohot hombar tu hagiot ni TUHAN
(ay.6-9//Yak.4:16)
Secara umum nada pola dibatasi TUHAN
habebasan ni si Salomo laho pasahat pangidoan tu Ibana, tapi dipangkilalahon
rohana asi ni roha do panabalonna gabe Raja uju i; nada harani napistar jana
naung marparngalaman ibana tarida do sikap ni si Salomo on di ayat na mamangihut.
1.
Disadari ia do bahaso ni
TUHAN namarsitutu (namanongtong) do jaminan di ngoluna (ay.6// Yak.4:16)
2.
Disadari ia do na TUHAN
do manabalkon ia gabe Raja; nada harani hamaloon sanga pangalaman (ay.7)
3.
Disadari ia do hagaleonna
na tarbatas mamimpin halak nabahat (ay.8)
4.
Diboto ia do na umporlu
ni bisuk sian na asing, anso bisa memahami, manimbang dohot mangatasi parkaro
na masa (ay.9). Hata bisuk marasal sian hata Heber: Hokma namarastuan kebajikan
intelektual. Hata bisuk di Bibel sekaligus do marsifat agamawi dibagasan
ngolu na praktis na marharoan/ marmula sian harani biar mida TUHAN (Poda 1:7).
Jana tarida do muse di kepemimpinan ni Raja Salomo bahaso sahala (wibawa) ni
Raja bahat dipengaruhi kebijakanna na mardongan bisuk.
Ä Dibagian paduahon on murtorang ma di hita toruk ni roha ni si
Salomo mangido naporlu di ngoluna hombar tu hagiot dohot sangkap ni TUHAN.
III.
Pangidoan nadenggan pasti sai dioloi TUHAN (ay. 10-16)
Hadengganan na nimaksud dison nada hum
hadengganan sian panatapon diri (hajolmaon), tapi angkon lalu do tu panatapon
ni TUHAN, anso adong hapastian dipangoloion.
1. Job ni roha ni TUHAN dipangidoan i pabotohon nadenggan do i di Ibana
(ay.10)
2. Dibaen na malo do si Salomo mamili nadumenggan sian bahat pilihan, gabe
dioloi jana dipasingkop TUHAN pangidoanna tu na dumenggan dope (ay.11-12).
Pangoloion ni TUHAN tulus dibaen adong persesuaian tu sangkapNa.
3. Diuduti TUHAN manambai na nipangido ni si Salomo, anso mur singkop:
hakayoon, hasangapon (ay.13)
4. Dapotan pasu-pasu marudut: ginjang ni umur muda burju marpangoloion di
TUHAN (ay.14). Marpardomuan tu kelangsungan kepemimpinan di tampuk harajaonna
(janji bersyarat).
Ä
Dibagian
parpudi on torang do taida bahaso pangidoan na denggan na dipahombar tu hagiot
ni TUHAN pasti do di oloi Ibana. Dungi
pe muse gabe marroha na gok bisuk Raja Salomo.
C. HAHONAAN NI JAMITA (I RAJ. 3 : 4 - 14)
01. Songon halak naporsaya
di zaman hamajuon saonnari biado hita mandalankon tanggungjawab dohot hakta tu
TUHAN ??? Tarmasuk hak marpangidoan tapargunahon do sanga merasa kuat sandiri ?
02. Haruspe sasintongna dilehen
TUHAN habebasan di hita marpangidoan; sadengganna tongtong ma tapasahat
pangidoanta dibagasan habonaran jana
hombar tu hagiot ni TUHAN.
03. Bolas jadi adong sian
hita na merasa mahonok mangido tu TUHAN, tapi nada marna tarida alusna (inda
tarbo-boto). Muda songoni porlu do hita mangoreksi isi ni pangidoanta i
nadenggan di hita sandiri do sanga denggan muse di panatapon ni TUHAN. Adong do
tolu bentuk alus ni TUHAN di angka tangiang: 1. Olo na jagitma; 2. Olo painte
ma hatihana; 3. Inda tola, dibaen maralo doi tu hadengganan ni ngolumu.
04. Antong marroha na gok
bisuk mahita mamikirkon dohot mamparayak angka nadenggan dingoluon hombar tu
hagiot dohot sangkap ni TUHAN songon na tarjadi tu Raja Salomo di turpuk
on. Amen.
Horas ma
di hita sudena.
Pdt.B.Nainggolan,
M.Th
GKPA Resort Tantom
”MARHAMALOON MARDONGAN TONDI NI DEBATA.”
JAMITA SIBASAON MINGGU
VII DUNG TRINITATIS
TANGGAL,
14 JULI 2013
NATS SIBASAON : I
KORINTUS 2 : 6 — 16
NATS BANDINGAN : I
RAJA-RAJA 3 : 4 — 14
Salinan
Nats Sibasaon: I Korintus 2 : 6 — 16
6
Haru pe songon i, anggo tu halak na dung togu haporsayaanna, laing huhobarkon
do nian taringot tu hamaloan. Tapi nada hamaloan ni portibi on sanga hamaloan
ni angka na markuaso di portibi on. Harana mago do kuaso ni halahi i.
7
Hamaloan ni Debata do anggo na
hupajojor i. Nada diboto portibi on hamaloan i, tapi madung dipasingkop Debata
hian i baen hasonanganta dompak so dijadihon Debata dope portibi on.
8
Sahalak pe nada adong umboto sangkap na nibaen ni Debata i. Angke sugari na
dung diboto halahi i, nada jabat parsilangkonon ni halahi Tuhan na sumangap i.
9
Tapi songon na nidok ni surat di Buku Na Badia i do, "Anggo di angka halak
na manghaholongi Debata, madung dipasingkop Debata hian angka na so unjung
diida mata, sanga dibege jolma, jana na so jungada muse dope tubu di bagasan
roha ni jolma."
10
Hape madung dipaboa Debata tu hita
sangkapNia i markite-hite TondiNia. Didodo Tondi i do sasude, lopus tu
angka na buni na dibagasan Debata.
11
Angke anggo na umboto sanga aha na di bagasan roha ni sada-sada halak, laing
tondinia i sandiri do. Laing songon i do Debata. Anggo na umboto sanga aha na
di bagasan roha ni Debata, Tondi Ni Debata sandiri do!
12
Jana nada dilehen tu hita tondi ni portibi on, tapi Tondi na sian Debata do,
anso taboto sudena na nibasa-basahon ni Debata tu hita.
13
Laing i do na hami hatahon, nada markite-hite hata na niajarkon ni habisuhon ni
jolma tapi markite-hite hata na niajarkon ni Tondi. Hami pajojor do angka
pangalaho partondion tu angka na maruli Tondi. *TU ANGKA NA MARULI TONDI:
Sanga: Marhite angka hata na nilehen ni Tondi Ni Debata.*
14
Halak na so maruli Tondi Ni Debata, nada tarjagitsa di bagasan rohana sanga aha
na nipatorang ni Tondi i. Harana songon haotoan do angka na songon i di halahi.
Nada haastuan halahi angka pangalaho na songon i, angke angkon sian partondion
do i tarastui.
15
Sanga ise na maruli Tondi Ni Debata, i do na mangastui arti ni sasudena i tapi
anggo ia sandiri nada tardodo sanga ise pe.
16
Harana, "Ise ma he na umboto roha ni Tuhan, sanga ise ma he na mamodai
Ia?" Tapi di hita do roha ni Kristus i
A. PATUJOLONA : I KORINTUS 2 : 6 — 16
Surat ni Rasul Paulus naparjolo tu Parlagutan
di Korintus dipatupa laho mambahas
persoalan-persoalan na masa di bagasan Parlagutan i; Parlagutan nadipajongjong
ni Rasul Paulus sandiri. Persoalan-persoalan i marpardomuan tu hangoluan dohot
haporsayaan Kristen. Di hatihai Korintus
gabe sada kota di Yunani, ibukota provinsi Akhaya na masuk tu wilayah
pemerintahan Roma. Pendudukna marharoan
sian bahat bangso na marragam, terkenal harani hamajuon di bidang pardagangan, paradaton na tinggi, tapi keadaan susilana
rendah, harani na adong marragam agama di inganan i. Na utama di pikiran ni Rasul Paulus ima
persoalan taringot tu parbolatan/ perpecahan dohot pangalaho na humurang di
Parlagutan i, masalah ruma tangga, parbagason, parrohaon, tata tertib/ aturan
di Parlagutan, silehen-lehen ni Tondi/ karunia ni Tondi ni Debata, dohot
hangongot ni halak na mate. Marhite
pandangan na bagas Rasul Paulus patuduhon Jamita nadenggan i manyorot
persoalan-persoalan na masa i.
Khusus turpuk jamita on masuk tu
bagian pambahasan napadenggan parbolatan/ perpecahan na tarjadi di Parlagutan i
(I Kor.1:10—4:21) dung jolo dipungka hata patujolo (1:1-9). Dison marmaksud do
Rasul Paulus mangajak Parlagutan i, anso sude rap tunduk tu Hamaloon/ Bisuk
naro sian TUHAN marhite Tondi-Na.
B. IMPOLA JAMITA : I KORINTUS 2 : 6 — 16
I.
HAMALOAN NARO SIAN DEBATA NAMARBEDA SIAN HAMALOAN PORTIBI (AY. 6 -8)
1.
Hamaloan naro
sian Debata, namarbeda sian hamaloan ni Portibion dohot parkuaso (ay.6).
2.
Hamaloan nasian
Debata, naso diboto Portibion, nadipasingkop baen hasonangan ni naporsaya (ay.7)
3.
Hamaloan
napapatar sangkap ni Debata, naso diboto Portibion (ay.8)
Ä Sudenaon patorangkon
bahaso dasar ni barita/ jamita nadenggan marharuan sian hamaloan ni Debata nasu
di boto/ ditanda portibion (dibaen naung dibagasan toru ni bura ni dosa/ kutuk
dosa). Hamaloan ni Debata do d fondasi
pamaritaon ni Jamita nadenggan, nada hum sekedar pandangan naro sian hajolmaon.
II.
MANANDA HALAK NADAPOTAN HAMALOAN SIAN DEBATA (AY. 9 - 10)
1.
Sude halak na
manghaholongi dohot na manjagit holong-Na dibagasan Kristus (ay.9). Dipungka sian
haporsayaan na marpanjagiton dipangkopkopion ni Kristus; dijangkon,
diparsaulihon jana dihangoluhon dibagasan jolma naimbaru.
2.
Sude halak
naporsaya nadung diingani/ digohi Tondi ni Debata ngoluna (ay.9// Gal.5:25).
Terbuka dohot disediahon do Jamita nadenggan i tu sude liat Portibion, tapi hum
tu halak naporsaya namanjagit jana nadiingani Tondi ni Debata do na Jamita i
marlaku efektif manuju hadengganan.
ÄSudena on manegaskon
keistimewaan dohot arga ni halak naporsaya na diingani Tondi ni Debata;
namarbeda sian jolma naso porsaya tu TUHAN dibagasan Kristus. Haporsayaan namangolu aktif mangungkap angka
hahomion na buni gabe patar dipanatapon disangkap dohot hagiot ni TUHAN nasai
manumpak tu na dumenggan (Rom 8:28)
III.
HAMALOAN SIAN DEBATA
PADENGGAN PANANDAION DOHOT PANJAGITON DI KAREJO DOHOT SANGKAP NADENGGAN SIAN
DEBATA (AY.10 - 16)
1.
Dipaboa Debata
sian na buni hian (rahasia) marhite Tondi-Na (ay.10)
2.
Tondi ni Debata
do naumboto rohaNa, jana ido dipasahat tu hita (ay.11-12).
3.
Nadi jagit sian
panuturion ni Tondi ni Debata ido na angkon jamitahonon (ay.13-14)
4.
Nadung taruli
Tondi ni Debata ido muse nabisa manjagit jamita i dohot denggan (ay.15)
5.
Panjagiton
nadenggan di jamita nadenggan dipengaruli panjagiton dohot pangolion di
panuturion ni Tondi ni Debata (ay.16; band.5:25)
ÆDison dipadamos/ ikon
Rasul Paulus do karejo ni Tondi ni Debata na mangalehen hamaloan, panandaion,
panjagiton di karejo dohot sangkap ni Debata na padenggan ngolu ni naporsaya.
C. HAHONAAN NI JAMITA : I KORINTUS 2 : 6 — 16
01. Muda taingot jamita
minggu parjolo Juni 2013 dipaingot do hita anso ulang manggodang diri (mamuji
diri) harani hakayoon, hamaloon dohot hagogoon, tapi gumonan ma mamuji diri
harani naung mananda TUHAN (Jer.9:23-26).
Diturpuk sadarion dajak hita anso manjagit dohot mamake hamaloan na
marharoan sian TUHAN marhite Tondi-Na.
02. Bahat pe halak
namalo sanga napistar di Portibion muda soadong do panandaion dohot biarna mida
TUHAN, gabe maroban hasesego do manfaat hamaloanna i di ujungna (band.ahli
penyebar sahit sanga virus on).
03. Ulang muse
hamaloanta tapargunahon tu pamola-molaon, songon na masa tu Parlagutan Korintus
hatihai. Harani ido baen na khusus dipatorang Rasul Paulus porlu ni hamaloan
naro sian Tondi ni Debata.
04. Antong tapangido,
tajagit jana tapargunahon ma hamaloan mardongan Tondi ni Debata parayak ngolu
na dumenggan dibagasan hagiot dohot sangkap ni TUHAN.
Amen.
Horas
ma,
Pdt.B.Nainggolan,
M.Th
GKPA Resort Tantom
Tidak ada komentar:
Posting Komentar